•!¦[• منتديات رياض للرياضيات •]¦!•

•!¦[• منتديات رياض للرياضيات يرحب بكم •]¦!•
 
الرئيسيةالبوابةس .و .جبحـثالتسجيلالأعضاءدخول

شاطر | 
 

 قصة عاميه بالهجه البحرانيه

اذهب الى الأسفل 
كاتب الموضوعرسالة
abu fardan
][ عضو ][
avatar

ذكر عدد الرسائل : 148
العمر : 24
~[ الأقامه : طالب
~[ الهوايه : السباحة
تاريخ التسجيل : 23/05/2008

مُساهمةموضوع: قصة عاميه بالهجه البحرانيه   الأحد يونيو 08, 2008 1:59 pm

مرحبا ... شلونكم ؟

حبيت أحط لكم قصة بالعامية اللهجة المحلية البحرانية

لو حبيتوها رح نكملها ولو ما حبيتوها قولوا لي عادي ما بحطها

اترككم مع الجزء الأول منها

افففف اليوم السبت … يعني بالعربي (دوام)
ام أحمد: أحمد .. يا أحممممد قوووم يا ولدي لا تغربلني عساك السعادة
أحمد: …
أم أحمد : حمااادووووه يلا عاد قلعت جبدي .. متى اعرسك و افتك من هالسالفة
أحمد والنوم في عيونه وصوته: ها ! بعرس ؟
أم احمد وفي خاطرها تضحك بس تسوي روحها شديدة (نفس كل الامهات ) : طالع ده ! سود الله وجه الردي .. يوم جبنا طاري العرس قام… يالله اجوف اوقف راوني طولك خلني اروح اجوف ريوق ابوك لا يسوي لي سالفة.
أحمد: اماه انا قايم بس انتين روحي وانا وراش
أم أحمد: قص على طباخة عشاك ماني رايحة اول تقوم .. هذه انت والسهر خله يفيدك !
أحمد: اوهوووووووو امااااااه واجد تأدين من الصبح..بعدين لا تقولين لي اقص على طباخة عشاي لان انتين وهندي كافتيريا المرجانة اللي صوبنا بس اللي تعشوني
أم أحمد: جدي تقول لي ؟ تبي تقص علي !عساك ملل .. زين جدي؟
أحمد وهو يقلع روحه و يتثاوب ويخلص الهوا عن اهل البيت : هدانه قمت .. ويش أعجبش الحين؟
أم أحمد وهي تطلع من الغرفة : يازين ولدي لين يطاوع .. عساني ابلغ فيك
أحمد : ياااااارب .. (ويركض الحمام).

عقب ربع ساعة يطلع أحمد من حجرته لابس فورمال قميص و نكتاي بعد وهو نازل الدرج يسمع الحرب اللي قايمة تحت .. امه و اخوانه يتهادرون على الأكل .. أما ابوهم قاعد يقرا في الجريدة ( متعود على هالسالفة)
أحمد : صباح الخير
الأم و الأبو : صباح النور
أم أحمد : هاك الجاي اشربه قبل لا يصقصق ( يبرد بس بالبحراني مال أول)
أبو أحمد : أقول ام احمد بسش دلال للصبي خربتينه
أحمد و هو يغص بالجاي : منهو الصبي بعد ؟ الحين أنا 22 يعني رجااااال وش كبري وراعي مسؤلية
( سارة 10 سنين و حسن 16 سنة) يدشون على الخط
حسن : اماه انا الرجال .. مو ولدش الفقيل
احمد : هييي انت جوف روحك قبل لا تتحجى .. كلهم عبالهم توك 10.. مفشلني ما تجوف ما اطلعك وياي..
سارة : اني بعد اني بعد اني بعد وعن 10 رجال
أم أحمد : والله بلشه في هالبنية … يبى لي اقعدها وياي ازيد .. واجد تاخذ من اللي في البيت و اني مساطرة بين 3 صبيان
أبو احمد يتعلف : يعني انا للحين صبي في عيونش يا ام ولادي ؟
أحمد وحسن : ايواااااا عاشوااااا ابوي يعرف يغازل بعد (و يقوم المصافر و المصافق)
أم احمد منحرجة من تعليقات أولادها : انجبوا يالله … احمدو قوم روح جوف شغلك .. وانتون يالله بيوصلكم اخوكم المدرسة ..سارووه لبسي حجابش و انت (تأشر على ابو احمد) ما وراك شغل له ؟
أبو احمد يسوي روحه يشتكي : جوفوا امكم كله تدز .. اشكرى طردة لكن ماعليه .. كلشي منش حلو و بارد .. يالله انا ماشي و جان تبين شي للبيت اتصلي فيني … فمان الله
الكل : في حفظ الرحمن

أحمد و اخوانه في الطريق
سارة: احمد .. يصير تمر علي في الهدة؟ .. ماحب ارجع في الباص كله يهدرون يسندروني
أحمد : ماعليه بس اليوم .. لا تتعودين على الدلاعة وش فيها لين هدروا سكتيهم
سارة : مشكوووور خيو حدك عجيب
حسن : طالع دي .. جيف يشتغل دريول حقش واحنى ما ندري!
سارة : انت بس تغار لان اخوي ما يردني
حسن : تفضل ! جب بس لا تنصفقين من صباحة الله
أحمد يوصل سارة اول بحكم الطريق وعند الباب تنقز من السيارة مستانسة : هكي معلمة بتووووول بروح اشيل اغراضها قبل لا يروحون ليها البنات …بااااي
حسن يحب ايده : الحمد لله والشكر … هبللللة اختك
احمد يضحك : ههههه اختك إلا انت!
وتالي وصل حسن مدرسته و راح السايت قبل لا يروح الشغل ( مهندس )

احمد بريكه من الساعة 1 إلى 2 ( مسكين بس ساعة لكن ما كان يبي يكسر بخاطر اخته فراح ليها )
في الطريق… طييييييط … طوووووووط
أحمد في قلبه : هدويييش الزحمة متى بيصلحون في هالشوارع
وعقب عشر دقايق يالله يالله لمح المدرسة و الزحمة هناك ازيد وهو يفكر لو اخته عندها تلفون اتصل ليها تجيه بدل ما يندعس لكن ما في امل
وهو يفكر والوقت يطوف و السيد يمشي بالقطارة........ إلا (طااااااااااخ ) احد دعم سيارته من ورى
ويستشيييط و هو طالع يصارخ : عساااااااك عمى يالغبي يالثور وش هالهبااالة انا عمري ما جفت احد يدعم في سيد وااقف ياااا…. ويسكت و هو يطالع هاللي واقف قدامه
وحدة تتنافض جنها جيلي ولو تهف عليها تموت من الصياح
أحمد يتراجع : اعوذ بالله من الشيطان .. يا الشيخة عدمتين سيارتي و سيارتش طالعي .. يالله ماعليه حصل خير
إلا بصوت … إهئ إهئ إهئ
انصدم احمد … وحدة تصيح قدامه يعني وش يسوي .. مو كفاية هي اللي غلطانه
البنت تتكلم : اني مو قصدي .. اني بس عبالي السيد مشى و ما … اهئ اهئ الحين ابوي بياخذ ليسني و ما بيخليني اسووووق
وتقوم كربلا عندها … دموع اربع اربع لو سامعة المصرع ما صادها كل دا
أحمد في باله اوووهووووو دلاعة غير شكل بعد انا ما لي مزاج… والاوادم كلها تهررررررن في الطريق
أحمد يتنرفز على صوت الهرنات: انزييييييييييين عساكم تيزاب في جبودكم الشمس حارقتني و انتون دوشتوني بس بس بس … وسلال يسل كل واحد حط ايده على الهرن … وطاعون يصيب كل … ويسكت و هو يطالع الوجه المنصدم قدامه( شكلها اول مرة تسمع واحد يتحلطم) حتى عن صياحها سكتت
أحمد باحراج : مسامحة مو وياش … البنت تقاطعه : ادري .. المهم ممكن رقمك بخلي ابوي يصلح ليك السيارة بدون مرور اذا تسمح.. ليسني جديد و ما ابي يحطون لي شي في ملفي
أحمد مو مستوعب في البداية : ها ؟ لا عادي ما فيها شي ولا تكلفين على ابوش
البنت : لا صدق اذا ابوي شاف السيارة بيعرف مني السالفة و بيهزئني فلين عطيته رقمك يصلح سيارتك بيعرف اني تصرفت
أحمد : جدي يعني … ( في باله ) : زين بعد طلعت تفكر ويكمل :انزين انا رقمي …….36
البنت عقب ما سجلته في تلفونها : اوكي مشكور ومسامحة على اللي صار و بنعوضك ان شاء الله … وعلى فكرة اني" بدور"و ابوي اللي راح يكلمك "علي" علشان لا تكون الاسامي جديدة عليك
أحمد : ماعليه حصل خير ومعاش أحمد.
بدور بدلال : عاشت الاسامي … يا أحمد
أحمد مصدوم ( في باله ) : وش هالحالة ما اعرف ارد عدل … بس كأن يقولون شي من هالقبيل .. ويرد عليها : عاشت ايامش اختي
تبتسم و تروح داخل سيارتها : بااااي
أحمد يدخل السيارة و هو يتطنز : هههه آخر زمن .. كأني في مسلسل
سارة تفتح الباب مرة وحدة : سلااااااام … حقويش تأخرت علي (وتفلت شنطتها ورى)
أحمد يتطعبز على روحه: وش اسوي دعمتني وحدة مسمية روحها بدور توها من شوي
سارة اللي جافت كل شي : صبر اني اعرفها ….بدور علي عبدالله سيارتها لكزس ذهبي عدل لو مو عدل؟
أحمد يعطيها نظرة : الحين بتقول اخت رفيقتها ! كالعادة انتين يم الديفان تعرفين كل الناس مسويه لش تحريات
سارة : صححححححح … بيه احمد ديلين بيتهم مليونيريه يتسبحون في الفلوس وكل شي عندهم رخيص و بلاش .. حتى يوم رحنا بيتهم عندهم 5 او 6 خدامات كل خدامة لشخص غير وحتى يوم كنا…. إلا يقاطعها احمد : هدويش انتين رويتر .. انا قلت ليش عطيني اخبار الحين؟؟؟ اما انتين بعد وهدرتش اللي ما تخلص .. بعدين يا بت الناس احنى ناقصنا شي ؟ مقصرين عليش بشي ؟ قاعدة وتطالعين الاوادم !!
سارة : لا موقصدي …بس جدي اسولف .. بس خلاص مابقول شي (تبرطم)
أحمد : احسن
ويوصلها البيت و يرجع الشغل الساعة 2 ونص متأخر نص ساعة عن بريكه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Admin
][ المدير العام ][
avatar

ذكر عدد الرسائل : 202
تاريخ التسجيل : 19/01/2008

مُساهمةموضوع: رد: قصة عاميه بالهجه البحرانيه   الأحد يونيو 08, 2008 8:41 pm

القصة حدها فن ابو فردان ، يعطيك العافية ، ننتظر الجزء الثاني منها , بدور صلحت سيارة احمد والا لا ؟

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://riadh-math.mam9.com
الاسْوَد
][ مشرف منتدى وسع صدرك ][
avatar

ذكر عدد الرسائل : 239
العمر : 23
~[ الأقامه : كرزكان
~[ الهوايه : شامل
تاريخ التسجيل : 20/04/2008

مُساهمةموضوع: رد: قصة عاميه بالهجه البحرانيه   الإثنين يونيو 09, 2008 7:08 pm

مشكووور على القصة

_________________

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://al-khalaf.yoo7.com/
كرزكاني
][ عضو ][


ذكر عدد الرسائل : 2
تاريخ التسجيل : 06/05/2008

مُساهمةموضوع: رد: قصة عاميه بالهجه البحرانيه   الثلاثاء يونيو 10, 2008 11:26 am

ويايد حاووه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
كرزكاني
][ عضو ][


ذكر عدد الرسائل : 2
تاريخ التسجيل : 06/05/2008

مُساهمةموضوع: رد: قصة عاميه بالهجه البحرانيه   الثلاثاء يونيو 10, 2008 11:41 am

وايد حلووه Smilies 3
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
AL muht@rif
][ مشرف منتدى التصاميم و الجرافيكس ][
avatar

ذكر عدد الرسائل : 105
العمر : 24
~[ الأقامه : student
~[ الهوايه : study & net
تاريخ التسجيل : 08/04/2008

مُساهمةموضوع: رد: قصة عاميه بالهجه البحرانيه   الثلاثاء يونيو 10, 2008 8:06 pm

مشكوووووور عـ القصة الحلوووة

ولا تتأخر نبي الجزء الي بعده :sm171:

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
فتى الأحلام
][ عضو ][
avatar

ذكر عدد الرسائل : 61
العمر : 23
~[ الأقامه : كرة القدم
~[ الهوايه : عصبي
تاريخ التسجيل : 12/03/2008

مُساهمةموضوع: رد: قصة عاميه بالهجه البحرانيه   الثلاثاء يونيو 17, 2008 2:09 pm

ثنكس على الموضوع
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
abu fardan
][ عضو ][
avatar

ذكر عدد الرسائل : 148
العمر : 24
~[ الأقامه : طالب
~[ الهوايه : السباحة
تاريخ التسجيل : 23/05/2008

مُساهمةموضوع: رد: قصة عاميه بالهجه البحرانيه   الثلاثاء يوليو 01, 2008 11:18 am

بارت2:-

ويوصل أحمد اخته البيت و يرجع الشغل الساعة 2 ونص متأخر نص ساعة عن بريكه إلا و مجتبى ( رفيقه من الشغل وفي نفس عمر أحمد ) يجيه مكتبه
مجتبى : هلا ابو حميد
أحمد : هلا بيك … ها ويش خبر ؟
مجتبى : جوعان حدي .. ما طلعت انبطن ساعة ونص نفس بعض الناس
أحمد يجكجك : جوك جوك جوك لوما الحسد ما مات احد … اولا يا لحبيب انا ما رحت آكل .. مع اني كنت ناوي بس صادني ظرف .. ابي آكل انا بعد
مجتبى يبالغ في انصدامه ويبقق عيونه : عسى ما شر! … انت تهد الاكل !! يامهدي ادركناااااا !!!
أحمد : هههههه يالحمار قايلين ليك انا آفه ؟! لا بس دعمتني وحدة ( و يشق الحلق ) و رقمتها ههههه
مجتبى : يابن اللذين … من متى هالحركات … جديدة عليك لكن تعجبني .. وش شكلها اوصف بجوف انزين ! خوفتي إلا جيكرة نفسك
أحمد بغرور : انت لو تتدحن ما بتصير نص حلاوتي
مجتبى : ويييييييع انا اصير نفسك ؟ فال الله ولا فالك .. بعدين انا سألتك عن البنية ما قلت تكلم عن روحك
أحمد : انت الحين من صدقك ؟ اخذت الرقم علشان تصلح السيارة .. هي الغلطانة
مجتبى : اففففف ما تعرف تسولف … انزين انا ابي اعرف شكلها معقوله ما طالعتها ؟
أحمد : هي زينة … بيضة وقصيرة ودليعة ولبسها كشخة بس ما عجبني و شعرها على ماظن مصبوغ بس هو… يقاطعه مجتبى : ايييي الحين يطلع الحجي منك يابو عيون زايغة .. شعرها بعد ها .. ما خليت شي حتى داخل حجابها دشيت!
أحمد : يالغبي البنية سفوور توني اقول لك هي كشخة ما انكر
مجتبى : الله الله طايح على كنز انت .. يعني من كلامك شكلها قطعة
أحمد : هي انت !!.. وش تبي توصل ليه
مجتبى يسوي روحه يستحي : انا ادري انك تفهمني ... انا ابي اتعرف من زمان وما محصل احد و ما في احسن من رفيقي خلف جبدي يشبكني بوحدة
أحمد : صل على النبي .. انا خلني احصل لروحي اول
مجتبى : قول انك حاط عيونك عليها ... واللهم صلي على محمد وآل محمد غصبن عنك
أحمد : تف عليك قوووووووم خلني أخلص الاوراق اللي علي
مجتبى وهو يقوم : ماعليه الليلة اراويك
أحمد بنحاسه : أي ترى الليلة العشى عليك .. انا واحد داعم .. يعني نفسيتي محطمة هههههه... و يروح عنه مجتبى عقب ما عطاه كم كلمة في العظم
خلص الدوام الساعة 5 ونص المغرب
وطبعا في الليل طلعوا الشباب ياكلون وعن حساب رجعوا من وقت (1 إلا ربع) علشان باجر دوامات واشغال ..
وطافت الايام روتينية شغل و ربع و بيت كالعادة... واتصل ابو البنية و تصلحت السيارة و طافت السالفة وجى الاربعا العصر- المغرب
رجع احمد من الدوام يبي ياكل كعادته إلا اخته ورفيقته قاعدين يسولفون ويا امه في المطبخ و يروح ليهم
أحمد : يالله ... السلام
ام احمد : عليكم السلام هلا بشيخ العشيرة .. حيالله ولدي
احمد متشقق : الله يحيش ويخليش و يبقيش
سارة تفوشر بأخوها : هذه اخوي الكبيير احمد ..احمد هذي حنين علي وياي في الصف.. اخت بدور
رفيقه سارة تطالعه بهبالة و ترد : أييي هذه اللي دعم اختي .. يوم تدش سارة السيارة اني كنت اوردي في السيارة ويا بدور و قلت ليها ان هذي رفيقتي
احمد شوي و يصفع الجاهلة : قصدش هي(يصر على كلمة "هي" ) اللي دعمتني!
ام احمد تكلم ولدها بالعدال : شوي شوي على البنية وش فيك هذي صغيرة ما تفهم .. و ترجع صوتها بنبرته العادية : اليوم الغدى لحم تحت العيش و في عدس وعيش أبيض بعد جان خاطرك
أحمد : حطي لي كلشي انا اعرف اتصرف ويا الاكل
ام احمد : انزين روح بدل و تعال خذ الصينية
احمد : لا انا ابي اتغدى في الصالة اليوم .. من زمان ما قعدت وياكم... (و ركب فوق يخلص اشغاله ونزل يتغدى وكلها ربع ساعة و هو مكمل )
وفي الصالة حنين يرن تلفونها ( جهال هالزمن كلشي عندهم ) : ألو ... أي .. كيفش ! .. اقول لأمها يعني ؟ اوكي باي
وتروح حنين لأم أحمد : اختي عند الباب تقول تبي تسلم عليش
أم أحمد : حياها الله .. سارة روحي دخليها
أحمد مندمج ويا التلفزيون والاخبار ما يدري وش يهدرون .. إلا و بدشة بدور : السلام عليكم
أم أحمد : عليكم السلام والرحمة حياش الله تفضلي دشي لا تستحين
ينتبه أحمد .. يطالعها شوي ( في باله ) : هكي ام الصياح ... يعني ما اخذوا منها السيارة .. حسافة
أحمد : عليكم السلام
وتقوم ليها ام احمد تحببها : شحوالش ؟ شحوال امش و بيتكم ؟ عساهم طيبين
بدور : الحمد لله زينين وامي بعد زينة و تسلم عليش ( عيارة )
ام أحمد : الله يسلمها .. حقويش ما جت وياش ؟
بدور : ها! .. اممم عندها اشغال ان شاء الله المرة الجاية .. يالله حنين امشي نروح
أم احمد : يوو حقويش مستعجلة قعدي شوي له... أحمد قوم خل البنية تاخذ راحتها
يقوم أحمد و هو يتأفأف : أففف انا طالع اصلا
و يطلع من الصالة يروح عند الباب وامه تخوزر فيه على حركاته
وترد عليه بدور وهو ماشي بدون ما يوقف : لا لا مافي داعي ما اقدر اطول اصلا مستعجلين .. يالللللله حنيين
وتروح ليها حنين : انزين .. سارة اجوفش يوم السبت
سارة : اوكي ولا تنسين تراويني تراكيش الجديدة
حنين : لا ما بنسى .. بايبااااي
سارة :بايااات
أم أحمد : في حفظ الله
بدور: باي سارة ... مع السلامة ام احمد
وتروح للباب تلاقي أحمد للحين واقف.. طالعته شوي بس هو ما كان منتبه و ساد المكان .. اضطرت تلفت انتباهه انها بتطلع : لو سمحت أحمد ..
احمد منصدم : ها ! أي مسامحة ما كنت مركز
بدور مستحية : ههههه أي يبين عليك سرحان .. مايندرى في شنو؟ كنت بدعمك واني طالعة للمرة الثانية (بعد عيارة ما كانت بترقع فيه ولا شي )
أحمد (في باله ) : وش مشكلتها الحين ؟ و يرد عليها : لا عادي ما صار شي ..يالله انا ماشي (تلفونه يرقع) وتوه بيتحرك
بدور : أي احنى بعد طالعين ... اقول أحمد !و سكتت تبيه يرد عليها فاضطر يوقف ليها
أحمد : تفضلي!
بدور تسوي روحها ما تدري : ابوي اتصل فيك ؟
أحمد : أي ما قصر سوى كلشي مشكورين.. و ان شاء الله تصلحت سيارتش بعد؟
بدور وهي مستانسة نست انها هي اللي سائلتنه : أي ودوا السيارات ويا بعض
أحمد (في باله):صادوووووه وتسأل بعد ! جذابة............ ويتكلم: انزين مسامحة بس انا ماشي هكو جو لي الربع ( ويأشر على التلفون و هو يرن)
حنين تتدخل : يالله بدور مو تقولين ما بنتأخر.. لا تقعدين تسولفين و توقفيني في الحر
بدور تنتبه لاختها وشكلها ما لاحظت زلة لسانها: اوكي امشي ..(وتبتسم ) يالله باي احمد و ان شاء الله نشوفك بعد
أحمد مستغرب منها: ؟؟؟ باي ( في باله ) : وشعندها كل شوي و نطقت اسمي ؟ قاعدة تتحفظه اشكرى! و تبي تشوفني بعد خخخ ام الشلخ ! و يهز راسه و يروح لربعه وينسى كلشي
ويوم ثاني الخميس نص دوام و الام مسكينة للحين في صراع الصبح لانها تبي تقومه بس وش تسوي .. تعودت على راسه الثقيل 22 سنة الحين ..
وفي الدوام
مجتبى : صباح الليل ... هدويش هالاشكال ! استغفر الله
أحمد ماله مزاج : اوهوووو وش تبي من صباحة الله ؟
مجتبى : انت محد يحاجيك يالنزر .. بدل ما تقول يسعد صباحك وتسأل عن احوالي تقول لي اوهوووو ! ما اجوف امك مقصرة في تربيتك بس انت مايندرى طالع جدي على من
أحمد يسب على خفيف لان للحين فيه نومه و يروح عنه مجتبى
عقب ساعة تقريبا أحمد صار فرش مصحصح فراح لمجتبى
أحمد : ها ويش ابو الشباب .. ما في مشاريع اليوم ؟
مجتبى يطالعه و يرد يكمل اللي في ايده و ماعطنه السين
أحمد : الووووو .. احاجي من انا !
مجتبى و هو متضايق : يااااا صبر أيوب على بلواه .. نعم ؟ خير ؟ ويش عندك !
أحمد : ويقولون عني نزر ؟ عجل الي يشوفك شيقول ! وش فيك منقلب علي
مجتبى : ولاشي .. سلامتك خلصنى !
أحمد يبي يغير مزاج رفيقه لان حس روحه هو المتسبب من اول : ايييييي ما قلت ليك .. بدور ( ويغمز) جت بيتنا
مجتبى (ياحبه لهالسوالف) يرد عليه عقب ما تعدل مزاجه من سمع سيرة بنية : اووووووه وش جابها ؟
أحمد: مو انا قايل ليك هي رايحة لاختها اللي تصير رفيقة اختي له ! يقاطعه مجتبى : لا لا ما قلت ..اوه تطورااات بعد .. صدف و لا مال أفلام هندية
أحمد يفسر : راقعتني عند مدرسة جهال وش تتوقع مودنها ولا مودني ديك الحزة ؟ اكيد نجيب احد .. المهم سألتني عن السيارة وهي تدري بكل شي بس حسيتها تبي تسولف ..واكتشفت بعد ان اسمي عاجبنها ههههه
مجتبى يبي يحط اكشن في السالفة غصب: هي قالت ليك !
أحمد : لا ما يحتاج .. كل كلمة و قالت وراها ( ويقلد صوت البنات و يتدلع ) أحمد
مجتبى : هههههههه اووووف طيحتها شكلك
أحمد : ههههههه لا وش عليك صغيرة شكلها 18 او 19 مثل ما يقولون .. مراهقة وام شلخ وانا ما لي مزاج
مجتبى : أي مو ديلين اللي يطيحون له .. اسألني و اقول لك .. وبعدين احد يرفس النعمة برجوله ؟
أحمد : الحمد لله والشكر .. اللي يسمعك يقول عندك درزن نسوان و ماخذ 4 على ذمة الرحمن غير اللي ما نعرف عنهم ..مو جنك لين جفت بنية ارتبشت و حتى كلمتين على بعض ما تقدر تقول
مجتبى بثقة : لو سمحت لا تعلق على اسلوبي المميز .. كل واحد و طريقته
(مجتبى في الهدرة يفلح بس عارف حدوده وما عنده حركات من صدق )
أحمد : اتحجى فيلسوف زمانه .. (يوقف) : انزين انا بروح الحين و في الليل بسوي اليك الو
مجتبى : صار ان شاء الله .. اذلف يالله ( بمزاح )
رجع احمد مكتبه و هو يفكر : لكن صدق في شي غريب في هالبنية .. احسها صدق معجبة فيني و مو قاعد اتخيل ! انا رحت الجامعة وشفت البنات شلون يتعاملون ومو شرط يكون عندي اخت في هالسن علشان افهم ليهم .. (وينتبه للوقت) افففف خل اكمل اللي في ايدي و الحق على غدى البيت و اشيل هالهرار من راسي .
وقبل لا يكمل الدوام بربع ساعة يتصل الابو يتحلطم على أحمد
أبو أحمد ( في التلفون) : يعني لمتى ؟ انا راجع من السوق جوعان ما اقدر اصبر ازيد و انت للحين في الشغل ! وش اسوي فيك يعني ؟ ما تحترم الاوقات و المواعيد ! لمتى ها !
أحمد: الدوام يخلص 2 .. ربع ساعة و انا ماشي و عطني 10 دقايق مسافة الطريق بس
أبو أحمد: لا حول ولا قوة إلا بالله العلي العظيم... انت اللي بتجيب لي الضغط ( ويسكر التلفون في وجه ولده)
أحمد في باله :وش هالهم.. إن تغدوا عني بسوي ليهم حرب
خلص الدوام و رجع احمد البيت و استانس يوم "ما" تغدوا عنه.. وصل و كلشي مبرز على السفرة .

عجبتكم القصة؟؟
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
HANDSOME
][ عضو ][
avatar

ذكر عدد الرسائل : 38
العمر : 23
~[ الأقامه : أرض الله الواسعـــــــــة
~[ الهوايه : السبــــــــــــابحة
تاريخ التسجيل : 11/04/2008

مُساهمةموضوع: رد: قصة عاميه بالهجه البحرانيه   الخميس يوليو 03, 2008 9:00 am

مشكوووووور عـ القصة الحلوووة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Admin
][ المدير العام ][
avatar

ذكر عدد الرسائل : 202
تاريخ التسجيل : 19/01/2008

مُساهمةموضوع: رد: قصة عاميه بالهجه البحرانيه   الخميس يوليو 03, 2008 10:20 am

مشكور على القصة وننتظر الجزء الثالث

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://riadh-math.mam9.com
علاووووي
][ مشرف منتدى كشافة الخليل بن احمد ][
avatar

ذكر عدد الرسائل : 326
العمر : 24
~[ الأقامه : طالب
~[ الهوايه : الكشافة
تاريخ التسجيل : 22/04/2008

مُساهمةموضوع: رد: قصة عاميه بالهجه البحرانيه   الخميس يوليو 03, 2008 3:47 pm

الصراحة تصلح

مؤلف مسلسلات

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قصة عاميه بالهجه البحرانيه
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
•!¦[• منتديات رياض للرياضيات •]¦!• :: •!¦[• الأقسام العامه •]¦!• :: ••[ المنتدى العام *~-
انتقل الى: